El 10 e 11 febraro, a Verona nel palasso dela Gran Guardia, ghe xe stà el primo Convegno sui "Parchi e Aree Naturali del Veneto: una risorsa da valorizzare per una politica di ascolto condivisa".
El Convegno xe stà presentà dal Sindaco de Verona Paolo Zanotto che el gà lancià i punti inportanti del discorso da portare 'vanti: senso de apartenensa e amore pa el teritorio; identificassion de aree da protégere; tutela, salvaguardia, crésita sistema Parchi; ricostitussion del verde e raporto dei citadini co l'anbiente.
L'assessore regionale Stefano Valdegamberi gà considerà i possibili punti de inportansa economica dei teritori a alta naturalità: inpulso turistico; produssion de qualità (vini, formaji, verdure, ecc.); novo modo de vìvare nel'anbiente da diféndare.
Antonio Confortin, coordinatore dei Parchi del Veneto, gà dà on panorama dela realtà zà presente. Da venti ani xe scumissià el lavoro, fadigoso e tante volte ostacolà, de organisassion de aree protète. Sié xe i Parchi nel Veneto: Parco Nazionale Dolomiti Bellunesi, Parco Naturale delle Dolomiti d'Ampezzo, Parco Naturale Regionale del fiume Sile, Parco Regionale dei Colli Euganei, Parco Regionale Veneto del Delta del Po, Parco Naturale Regionale della Lessinia. El coordinatore dei Parchi el fa oservare come in tuti 'sti ani sia stà organisà solo adesso el 1° Convegno e par tuto 'sto tenpo sia sta poco curà la conosensa dele aree protete. Conosensa da trasmétare soratuto ai studenti de tute le età e ai citadini che pol trovarse a vivare dentro o vissìn a on Parco. Quatro i punti inportanti da curare par far vivare on Parco: biodiversità, produtività, energia alternativa, comunicassion.
Lucia Turri, fiola del grande Geografo Eugenio Turri, gà presentà on inportante video che riporta na bèla e interesante intervista del Professore. El teritorio de studio preferìo da E. Turri xe senpre sta el Monte Baldo, e a questo el gà dedicà anca on libro, "Il monte Baldo"; ma, da Turri, tuto el Veneto xe stà osservà co interesse profondo a partire dai canbiamenti dei ani '70 che gà segnà on forte svilupo economico fretoloso, sensa na vera progetassion ordinata e soratuto rispetosa dei grandi valori del'anbiente. Secondo E. Turri xe inportante e urgente catare el modo de rinovare e salvare quelo che resta del Veneto. Conservare el più posibile l'identità paesajistica straordinaria dela nostra Region: vile storiche, centri storici, centri balneari, zone colinari, zone de pianura e de montagna; educare fin da l'infansia al'amore pal proprio teritorio e ala conosensa dela cultura e memoria che lo gà reso, nel tenpo, così bèlo e particolare. Gà comemorà e ricordà l'inportante lavoro del Prof. Turri, Ugo Sauro de l'Università de Paodva; Vittorio Castagna, Presidente Accademia Scienze, Lettere ed Agricoltura de Verona; Giuseppe Pagano, V. Direttore Dipartimento di Storia de l'Università de Parma e Mario Rigoni Stern, da tanti ani amico e stimatore dele idee de Turri e vero grande portavoce e sapiente interprete dei messaji che la natura e el paesajo ne manda.
Xe stà anca presentà la "Carta di Verona per il buon governo dei Parchi e delle Aree Naturali Protette" e tante xe sta le proposte e le idee espresse su 'sto argomento che el sarà motivo de altri incontri come quelo del 5 majo 2006, all'Abbazia di Praglia (PD) intitolà "Mettiamo il Veneto in Europa: Parchi e Reti Ecologiche del Veneto, un progetto strategico per coniugare cultura e natura, sviluppo e salvaguardia".

Luciana Ecchiotti