Me piase pensare che a Padova ghe xe l’Orto Botanico pi antico del mondo. El xe sta fondà el 29 giugno 1545 so “campi cinque, quarti tre manco tavole venti”, pari a 22.000 mq, tolti in afito dai Monaci de Santa Giustina par 2 ducati l’ano. La sielta de ‘sto posto la rispondea ale necessità che ga on Orto Botanico, che xe par prima l’aqua: par poére coltivare e inbearare ben tute le piante ’sto posto jera bagnà, su tre lati, dal canale Alicorno. In seconda, el dovea essare in sità, rente l’Università parché tuti i professori e i studenti poesse visitarlo co’ comodo e studiare i “semplici”. L’Ateneo patavino xe senpre sta atento e sensibile al studio dele piante medeçinali considerando inportantissimo poderle védare “dal vero”, coltivarle e osservarle in tuto el periodo de vita e dele stajón.
Zà nel 1546 se podeva visitare l’Orto e jera sta messo 1500 piante. Par rendarlo acoliente, comodo da visitare e sfrutare ben el spassio, el progetista Daniele Barbaro (secondo Margherita Azzi Visentini) se ga ispirà ale forme dei giardini rinascimentali, creando on cerchio che “inscrive” on quadrato diviso da do viali che forma quatro quadrati e nele aree esterne se forma oto triangoli, e quatro portoni che conpleta el perimetro del cerchio disposti secondo i punti cardinali. Par i studiosi del “Giardino Storico” el progetista de l’Orto ga vossuo rapresentare in ‘sto modo on vero “microcosmo” dove poére ricreare anbienti diversi. Xe inportante considerare che in pieno Rinascimento i siensiati e pi oncora i botanici i scomìssia a védare le piante non solo co’ intaresse pratico (sostanse medeçinali) ma par la belessa e diversità e nasse cossì on forte scanbio co’ tuto el mondo de piante, erbe e fiori. L’UNESCO nel 1997 lo ga riconossùo come el pi antico Orto Botanico del mondo e par la sapiensa dimostrà nel tenpo, par la didatica, par la ricerca conservativa e sientifica, da téndare e mategnere vivo come patrimonio de l’umanità.
’Desso l’Orto necessita de on inportante laoro de restauro. I forti tenporali estivi, fasendo càdare piante secolari ga fato gravi dani al recinto, le sère otocentesche bisogna risanarle e farle funsionare, le aiole ‘e deve éssare riordinae secondo i bei disegni del progeto, la sèra che ripara la “palma de Goethe” bisogna rifarla parché la xe deventà picola, bisogna sciaresare i àlbari che così fissi no i pole vìvare ben e ormai i sconde do viste inportanti come el Santo e Santa Giustina. In pi xe sta conprà da l’Università l’ex area “Tre Pini”, che xe granda quasi quanto l’Orto storico e che deventarà la parte nova e moderna ciamà “Nuovo Orto Satellite”, la sarà costruìa rispetando la “Carta di Edimburgo” che ordina le linee guida par i giardini botanici e storici, e anca in questo Padova sarà la prima a seguire i novi regolamenti e l’esperimento el xe tanto spetà e vardà con atension dale Università de Montpellier (Francia) e Jena (Germania).
El 23 febraro 2006, nela seicentesca Villa Soranzo Conestabile a Scorzè ghe xe sta na tavola rotonda del XVI Corso de Agiornamento sul Giardino Storico de Padova par far conóssare el progeto de restauro de l’Orto storico e el novo progeto de l’Orto satelite. Dopo la presentassion dela prof. Antonella Pietrogrande, coordinatrice del Corso, la prof. Francesca Chiesura Lorenzoni, de l’Università de Padova, ga contà tuto el periodo storico de l’Orto. A partire dale intension dei primi fondatori (Horto Medicinale) a quando la Botanica se ga trasformà in Scienza a sé stante canbiando le sorte, el numero de piante e el modo de coltivarle: interesse ecologico, specie de altri anbienti e costrussion de sère riscaldae, aule par lession (Teatro Botanico), Erbario, Biblioteca, abelimento de aiole.
E semo rivài ai tenpi nostri. L’arch. Giorgio Strapazzon ga presentà el progeto che ga vinto el concorso su altri 14 progeti. Come previsto dal bando sarà conservà el pi possibile l’area storica e mantegnuo i segni del tanto tenpo passa. Secondo i progetisti sarà zontà in modo armonioso la parte nova che la dovarà rispóndare a esigense moderne. El bando de concorso ga ordinà i punti pi inportanti da tegner conto: sère e spassii tenici par le atività de l’Orto Botanico; spassii par métare ben in mostra tre progeti culturali (“La Pianta e l’Uomo”, “La Pianta e l’Ambiente”, “La Pianta nello Spazio”); ’na sala didàtica; anbienti de servissio e acoliensa del publico; on “bookshop”.
Nel progeto ghemo possùo védare quanto posto sarà ocupà dai 5 padilioni (sère) in véro e altri materiali super moderni che mostrarà i 5 pi inportanti anbienti terèstri, dala foresta tropicale ala tundra siberiana. ’Na gran curiosità ghe sarà verso el padilion che presentarà “La Pianta nello Spazio”, parché oltre ala forma de naveta spassiale tuto l’anbiente sarà costruìo par coltivare in modo dal tuto artificiale ogni sorte de piante, prevedendo che in futuro le sarà necessarie nei longhissimi viàji spassiali. Saremo noaltri, stavolta, a védare el gran canbiamento storico de l’Orto Botanico. Mi spero tanto de no restare scontenti e soratuto vorìa che el deventasse on spassio da poder frequentare sì co’ rispèto ma co’ confidensa e curiosità, nele diverse stajon, quasi come se el fusse el “nostro orto”. E spero tanto che el mantègna anca ’naltro primato in Italia, quelo de ‘vère parecià (1991) abastansa ben on percorso par non vedenti e ipovedenti e che in tuto el progeto, sia restauro che parte nova, sia previsto el conpleto abatimento dele bariere architetoniche.

Luciana Ecchiotti