Che strano modo de coltivare serte piante che ghe jera in canpagna quando mì jero picola!… e man man che cressevo me pareva anca ‘na roba normale. ‘Na vigna se ranpegava davanti al muro dela casa invese che essare nel vigneto; i fasiói e le suche i cresseva nele “teste” dei canpi de formenton invesse de essare in orto; i fiuri come le dalie, zinie, astri, gladioli, iris e crisantemi i cresseva in orto invesse de essare in jardin… e l’orto jera recintà quasi senpre da basse siése de ligustro profumatissimo o da ibisco co bei fiuri che durava tuta l’istà. ‘Na frase, qualche volta go sentìa, “co i fiuri no se magna”… Alora, secondo mi, sicome se ga bisogno de posare i oci so qualcossa de beo par consolare e dare da magnare ala nostra ànema, e par questo xe adati proprio i fiuri, xe nato ‘sto modo, quasi de scondón de coltivarli. Xe pi fàssile sapetare e cavare erbe mate ‘torno ai fiuri finché se xe drio curare e inbearare la salata o metare on paleto par tegnere ben in piè le dalie e i crisantemi quando se mete i paleti ai pomodori… così se podeva gòdare la belessa gioiosa dei fiuri come se i fusse nati da soli, sensa che nessun ghesse “perso tenpo” a coltivarli, e i faseva ‘na parte inportante quando la domenega on bel masso jera in mezo ala tóla, o so l’altare dela Madona, o nele tonbe dei nostri morti… 

Ogni stajon gavea i so fiuri finché le prime bróseme de otobre ghe ne fasea restare solo uno che el deventava oncora pi belo proprio sol finire de otobre e primi de novenbre. La nona Ana la curava par tuta l’istà sto gran sciapo de fòje de on bel verde sénare e tute seghetàe che le pareva on ricamo. Mi ghe jero senpre drio e quando che le tocavino restava ‘torno on aroma forte, on profumo, proprio del crisantemo. Quando vegneva a Festa dei Morti eco che portavimo dei bei crisantemi bianchi nele nostre tonbe. A chei tenpi, però, nessuno gavarìa messo in casa on masso de crisantemi, lori jera fiori coltivai co tanto amore ma solo pa’ i morti. La nona Ana no la conosseva de sicuro quanta storia e da quanto distante rivava el Crisantemo e mi me piasarìa ‘verla qua par contàrghela on pochetin, come la faseva ela quando mi domandavo tanti “parché?”. 

“Sèto nona, crisantemo ‘riva dal greco khrysànthemon, da khrysós = “òro” e ànthemon = “fiore”: fiore d’oro! La so storia xe antichissima e la parte dala Cina, ai tenpi de Confucio, 500 ani prima che nassesse Gesù e mile ani dopo anca in Giapone, passando dala Corea, ‘riva sto fiore che tanto el piase ai giaponesi da nominarlo come fiore sinbolo de vita e presentarlo in tute le manifestassion umane: l’imàjine dei crisantemi xe riportà in tute le ópare d’arte e de fantasia, nela poesia, nele favole, nele legende… nei paraventi, nei ventagli, i vien ricamai su le stoffe, dipinti su le porcelane e incisi su le armi…” 

“La coltivassion del crisantemo in Giappone la deventa inportantissima, i giaponesi i riesse a creare tante varietà del fiore d’oro da poder fare giardini intieri solo de crisantemi e ogni ano i faseva ‘na gran festa religiosa nei giardini inperiali pieni e strapieni de sti fiori de tute le varietà. Nel stèma inperiale xe riportà el Crisantemo Semplice Hironishi sielto come fiore inperiale e el ga da ‘vere 16 petali.” 

“E qua da noaltri, quando xei rivà? Ghe xe stà ‘na gran confusion fra i botanici… Qualcuno ciamava crisantemi altri tipi de fiuri finché Linneo ala metà del ‘700 li classifica ‘na volta par tute. Pare che i primi fiuri sia rivà dala Cina in Francia e dopo esportà anca in Inghilterra e Italia e i jera coltivai solo nei orti botanici come curiosità e parché i fioriva quasi in inverno. Solo ‘torno al ‘800 xe scomissià, in Europa, la coltivassion del crisantemo e el gusto de inventare varietà nove par forma e colore dei fiuri. Ma no bisogna desmentegarse che in Dalmazia nasse spontanea la pianta del Crisantemo Cinerariaefolium o Piretro: tanto inportante parché coi fiuri se parecia la polvere inseticida de Piretro e proprio par sto scopo el vien coltivà anca in Bosnia, Erzegovina, Montenegro, Italia e Giapone.” 

Ai nostri ani, in otobre e novenbre i marcà e tute ‘e fiorerie ‘i straboca de crisantemi, mi no so dire quai che me piasa de pi. Bianchi, zali, supa, rosei o arancion, a fiori grandi, medi o pìcoli, alti, bassi, a cussin o a albareto… e vorìa ‘verli tuti. Me dispiase non poderli regalare parché i xe oncora tanto considerai i fiuri dei morti ma vedo, co piassére, che tanti i li conpra par inbelire i jardini e le terasse in autuno e so’ contenta quando, in otobre vao catare ‘a me amica Rosa e el so salotto xe guarnìo da on gran masso de crisantemi bianchi e zali, dopo, la me porta in terassa e la me mostra la so spetacolare pianta de crisantemo che da tanti ani la ghe fiorisse senpre pi bela. 

So la coltura del crisantemo xe sta scrite tante pàjine ma par proare a coltivarghene ‘na pianta basta séliare on posto al sole, in piena tèra o in vaso, in primavera e de istà concimarla e inbeararla bén e spetare l’autuno par gòdarse ‘na bea fioritura; in inverno ocore ripararla on poco dal gelo pi forte e così rifare ogni ano el ciclo naturale de ‘sto “fiore de òro” sinbolo de vita.

Luciana Ecchiotti