"Fiore de late"

pubblicato sul mensile QuatroCiàcoe nel febbraio 2007

Conta na legenda inglese: “…quando Eva la ’ndaseva tuta trista ricordandose del Paradiso terèstre e criando par ’verlo perso, on angelo la ga vista, e el ga deciso de végnere in tèra a consolarla. Dopo èssare stà parà via dal Paradiso, nela tèra no cresseva pi gnanca on fiore ansi, la neve la cadeva senpre pi forte, coersendo tuto, tanto che el mondo el pareva fermo, fredo e incantà. Cami-nando in fianco a Eva a l’angelo ghe xe vegnùa ’na gran pietà par ela e el ga vossùo farghe on pìcolo regalo par consolare la so tristessa. El ga ciapà in man on fioco de neve, el ghe ga dà on supion liziero e ordinandoghe de modificarse lo ga dassà càdare in tèra. Cossì dala tèra xe nato on pìcolo, deli-cato, belissimo fiore bianco. “ ’Sto fiore xe na garansìa che l’istà no xe morta”, ga dito l’angelo. Ai oci bagnài de làgreme de Eva el fiore xe parso cussì belo e pressioso, el pi belo de tuti i fiuri visti prima e l’angelo contento de ’vere ridà on soriso a Eva el xe tornà in cie-lo.”

Sùbito xe stà naturale darghe on no-me a ’sto fioreto. In ogni posto dove che ’l nasse xe stà sercà nomi che lo descrive nela so delicatessa, senplicità, elegansa e stajon de vita, a dimostrare come in tute e culture el riesse a svejare chel senso de amore e speransa che l’angelo el voleva donare a Eva (e a tuta l’umanità). In Italia lo ghemo ciamà bucaneve, i francesi i lo ciama perce-neige (“bucaneve”, come noaltri); in Svissera tedesca i lo ciama Anselblume o “fiore del merlo” parché i ga osservà che quando el nasse anca i merli scomìssia i so canti de amore. Par i te-deschi el rapresenta l’amore zóvane e la senplicità e i lo ciama Schneeglöckchen o “piccola campana di ne-ve” e anca i spagnoli ghe dà on nome quasi conpagno Campanula blanca; i inglesi invesse i ghe dise Snowdrop, “goccia di neve”.

Anca el so vero nome botanico me piase tanto: Galanthus (dal greco ga-la=latte e anthos=fiore).

El Galanto fiorisse nei nostri Còli Eu-ganei nela prima metà de febraro e mi no perdo mai l’ocasion de ’ndarlo a ri-védare ogni ano. Ben inbacucà parché xe fàssile che ghe sia davero la neve o dele bróseme straordinarie, pian pian me inoltro pa le costiere che ormai co-nosso, i me passi calmi i zonta on pìcolo rumore che se confonde coi rumori del bosco: qualche zolare de scrìcioli o petirossi, qualche fòja seca che se move co l’aria… Se la jornata xe bela linpida e no tanto freda me piase fermarme a gódare de ’sta chiete e dove el bucaneve xe in fiore xe ’na vera maravéja. E eco, che in tuta ’sta calma, prima che l’ultimo rajo de sole se stua, xe fàssile védare on merlo posarse so la ponta pi alta de na rama e scomissiare a intonare el so forte canto de amore e ogni volta, anca par mi, xe el segnale proprio sicuro, che l’inverno sta par finire anca se no xe gnancora finìo le so borasche de fredo.

Luciana Ecchiotti