La pianta de le fate

pubblicato sul mensile QuatroCiàcoe nel marzo 2007

Èco finalmente! ’Na pianta antichis-sima (reperti archeologici del terziario) che xe proprio tuta nostra. No ghemo da ringrassiare né oriente né ocidente né viajatori o esploratori. La xe proprio dela nostra flora spontanea e chissà quanto la xe stà inportante par nutrire i primi esseri viventi dela nostra pe-nisola quando le popolassion vivéa dei fruti che i catava sui àlbari dele foreste.

Corylus Avellana (o Nuces Avella-nae: la nocciola e Avellano: la pianta); Avellana dal nome del paese Abella (in provincia di Avellino) forse parché la zona jèra piena de ’sti àlbari. In quanto a Corylus, deriva dal greco córys, che vuol dire “casco”, parché la nosèla la xe sarà in chela pelìcola verde cole franze che la pare on casco o ’na baretina plissetà.

La noselara la xe ’na pianta senplice tènara e gentile: no granda (al massimo 6 metri), cespuliosa e rotonda ma co’ rame fine che se veste de bele fòje morbide e on poco pelosete fa ’l veludo, coi bordi dentà e a forma de cuore (cordate). In tuta la nostra penisola la cresse ben basta che no sia massa caldo e seco o massa fredo (in montagna oltre i 1.000 metri) ma sicuramente anca nei posti manco adati la pole vìvare purché no se pretenda che la fassa tanti fruti. La porta fiuri maschili e feminili nele stesse rame e par questo la se dise monòica (con una sola “casa”). Nel mese pi fredo de l’ano, in genaro, la vedemo rivestìa de ’na splendida fioritura de pìroli (amenti) lunghi anca 10 sentìmetri che pende dale ponte dele rame e carichi de pòline i vibra al pi picolo sùpio de vento. E xe proprio el vento (inseminazione anemofila) che porta i granèi squasi invisibili de pòline nele pìcole gème dei fiori feminili, sparse nele ramete de tuta la pianta e che sola ponta e ga on ciufeto, come dei fileti color porpora (stili e stigmi) che tratién l’elemento inportante par ’a fecondassion. Ma la fecondassion non sucede subito. I fioreti feminili no xe gnancora pronti e quasi magicamente, come on mistèro dela natura tuto resta fermo finché verso marso aprile nel gran fermento primaverile, co le tenperature pi tièpide, eco che anca la noselara con-pleta el so processo de vita e de ripro-dussion. Se capisse cusì quanto inpor-tante xe le condission de l’anbiente nel periodo fra genaro e aprile e come queste influensa a favore o contro la frutificassion de ’sta cara e generosa piantina.

La noselara xe una dele piante pi carghe de miti e legende, insieme al so fruto la xe circondà da magìa e sapiensa sia par i vivi che ga senpre bisogno de presense benefiche che jùta a vìvare, sia par i morti che ga bisogno de afrontare ’na “vita nova” mai conossùa. El so legno xe sta senpre usà dai rabdomanti par catare e vene de aqua parché, i dise, el legno de noselara ga la possibilità de sentire le onde de risonansa che manda le vene de aqua da soto tèra… Par questo, i sercava dei rami fati a forcela e tegnéndoli in man e caminando nel posto dove che podeva èssarghe aqua i sentiva le vibrassion particolari che la forcèla mandava se davero l’aqua ghe jera. Ma bachete magiche doparàe da fate bone e da strighe manco bone jèra senpre de noselara. Dai Greci e Romani jèra forte la credensa che tocando ’na bissa, o on scorpion con ’na rama de noselara li restasse insemenìi e par questo, soratuto i pastori i usava fàrsene dei bastoni par jutarse finché i caminava pascolando le piégore e par difendarse dai mor-segoni de animali velenosi. ’Na belissima poesia de G. D’Annunzio sa creare tuta l’atmosfera del lavoro antico dei pastori: “… / Han bevuto profondamente ai fonti / alpestri, che sapor d’acqua natia / rimanga ne’ cuori esuli a conforto, / che lungo illuda la lor sete in via. / Rinnovato hanno verga d’avellano. / …”

E nel mondo dele fàvole, xe sta ’na raméta de noselara che ga salvà Cenerentola dala cativéria dela marégna. Piante de noselara regalava i Romani par augurare pace e prosperità. In Germania, se contava, se doparava bachete de noselara par obligare e strighe a restituire la fecondità ai animali e ale piante. E, durante le procession religiose vegnéa benedìe ramete de noselara da métare nele tonbe par augurare ai morti ’na nova vita. Àlbaro dela Sajéssa e de l’Ispirassion poetica e par questo i Druidi usava tavolete divinato-rie del so legno par ispirarse scrivendo létare magiche.
La nosèla no xe manco famosa dela so pianta in quanto a maìje. La xe on fruto tanto e tanto nutriente che in gran parte xe formà da grassi, carboidrati e proteine. De gusto dolse e delicato se pole magnarla fresca o séca, usarla par fare crocanti, mandolati e mescolarla co’ pasta da torte o ciocola-te. La farina de nosèle e quela de cacao forma la bonissima gianduia, pasta par pareciare i gianduiòti torinesi. Se par i Celti el jèra on fruto sinbolo dela sagessa concentrà, dolse e forte nel stesso tenpo e sarà dentro on sgusso duro e resistente, par i romani el jèra sinbolo de Fecondità e Riprodussion e proprio par questo nel festejamento dele nòsse vegneva donà sia le nosèle sia le piante, come bon augurio; i contadini russi portava senpre nele bissache ’na nosèla come portafortuna e mi, che no so’ russa, né cèltica ma forse on poco romana, da tanto tenpo tegno nela scarsèla dela jacheta la prima nosèla nata dala me noselara. La tegno par conpagnìa, quando che camino coi me pensieri e le man in scarsèla nel palmo dela man go ’sto pìcolo scrigno che no me fa sentire sola.
La nosèla xe ligà anca a ’na divinità feminile che W. Shakespeare descrive tanto bén in “Romeo e Giulietta”, quan-do Mercuzio, amigo de Romeo, el con-ta come che xe fata la carossa de Mab, la regina dele fate, quela che fa végnere i sogni: “Il suo cocchio è un guscio di nocciola: uno scoiattolo che lavora il legno o un vecchio lonbrico, da tenpo assai lontano, fanno i piccoli carri delle fate. E così Mab galoppa, notte dopo notte, dentro i cervelli degli amanti, ed essi sognano d’amore…”

In tute le case de canpagna no xe mai mancà la presensa de ’sta pianta cussì modesta, discreta, sensa esigen-se e tanto generosa de fruti dopo qual-che ano da l’inpianto. Nela me casa de quando jèro putèla me ricordo on vero salòto verde formà da quatro o sinque cespùlii de noselare. Là la mama e la zia le se meteva a fare el gran laóro dela lìssia: l’onbra fresca, la luce filtrà dale fòje, el parlotare e el rumore dele arte sguaratàe, bruschetàe e sbatùe, xe ’na sèna che me ricordo co tanta teneressa. Ma el salòto de noselare jèra anca el me posto dei “sogni”, el posto chièto dove lésare o disegnare e dove co’ le me cujine zugàvino ore e ore a “mama caseta”. E le piante de nosèle le me donava legno giusto e proprio adato par “zugare a guèra” co me fradèli. Sèrte rame deventava archi e sèrte che se biforcava le deventava forcèle da fionde. Quando se metévino in testa de zugare a guèra, prima bisognava procurarse le armi e alora le noselare jèra la nostra risorsa. Se metévino a laorare co’ brìtole e cortelini, àstichi de camardària e spaghi ma volévino anca incìdarle e guarnirle ben come che dovéa essare le armi dei grandi guerieri; intanto pas-sava el tenpo e ora che i nostri atressi podeva essare usài se jèrimo desmen-tegà del zugo dela guèra parché jèra stà pi forte el zugo dela costrussion, dela belessa, vorrìa dire de l’arte… Che el fusse on efèto màjico proprio dele noselare?

Le nosele vegnéva catà su co’ cura e messe al sole a secare. De inverno le deventava el “fruto de l’amicìssia”. Ne-le longhe sere, quando se faseva filò in stala, coi vissini o parenti, on sestèlo de nosele jèra la presensa, insieme a on gòto de vin, che scaldava el discórare e el scanbio de esperiense dei òmeni, el cùsare dele fémene e el zugatolare dei putèli.
Eco la vera magìa dela noselara! La belessa discreta, la generosità, la mo-destia intrecià al modo de vìvare de ’na volta. E adesso? Provemo a piantare, par i nostri putèli ’na nosèla in jardin; basta on pìcolo jardin, basta anca on vaso sol terasso e stemo a védare l’efèto che la fa…

Luciana Ecchiotti