Home .Sugli alberi A06 (Alberi) El persegaro

El persegaro

pubblicato sul mensile QuatroCiàcoe nelll'aprile 2007

On àlbaro che crea ’na aria sicura de primavera ma soratuto de ’na gran fe-sta rilijosa, festa de Resuression, xe el persegaro (Prunus persica). Verso la fine de marso, nela prima metà de aprile, sta pianta ne dona la so dolse fioritura che insieme al sóno dele canpane e al ritorno dele rondini crea la gioiosità del dì de Pasqua. El persegaro xe ’na pianta antichissima e tuti, anca esperti inportanti i la fa rivare dala Persia e invesse, oncora ’na volta bisogna ringrassiare la Cina parché là ela nasse in modo spontaneo nele montagne ai confini col Tonchino e la Birmania; dopo la xe passà in Giappone; Alessandro Magno la porta dala Persia in Grecia. I romani i spande la coltivassion in tuta Europa. Nel 1600 i spagnoli porta el persegaro in Messico e in America meridionale; e pì tardi el riva in California: dopo el vien portà in Australia, Africa setentrionale…

Quanta strada! No se pole dire che sto fruto gustosissimo no’l gàbia viajà tuto el mondo grassie anca ala granda adatabilità dela pianta ai climi e ale tè-re. In Cina, so paese nativo, el perse-garo xe considerà da senpre Àlbaro de imortalità. In Giappone el xe venerà come protetore contro le fòrse malèfi-che: la so fioritura xe sinbolo de Rino-vamento, Rinàsita, Belessa dela Gio-ventù, Puressa verginale, Fedeltà e el vien regalà, spesso coltivà a bonsai, ai sposi novèli. In Egitto, par la forma dela fòja, simile a na léngua, el ga ispirà el sìnbolo del Silènsio.

In Europa el xe senpre sta visto come àlbaro benèfico e guaritore de frève, pòri (verruche), gòzo… Secondo el linguajo otocentesco dei sentimenti, quando se dona a ’na persona ’na rama de persegaro in fiore se ghe manifesta Amirassion e totale Dedis-sion. El fruto, el pèrsego, cossì veludà e co i colori cossì delicati xe senpre sta’ paragon dele massèle dele bèle tose. Italo Calvino, nela so belissima canson “Oltre il ponte” el scrive: “O ragazza dalle guance di pesca, / O ragazza dalle guance d’aurora, / Io spero che a narrarti riesca / La mia vita all’età che tu hai ora…”

’A coltura del persegaro xe de gran-dissima inportansa economico-agraria. Nel tenpo xe sta selessionà varietà che fa gustare pèrseghi par tanti misi de l’ano e el Veneto (specie nel Veronese) xe ’na rejon de grandissimi coltivatori de persegari che òfre tante varietà de fruti e imènse fioriture, de tute le tonalità de rosa, in primavera. Ma mi me piase pensare a on tipo de coltura, solo spontanea, che me xe capità de védare (e vìvare) quando che jero putela.

Se sa, i contadini salariati, canbiava de paròn e de casa senpre in San Mar-tin parché jera finìo l’ano lavorativo. Cussì xe sta che la me faméja xe ’ndà stare so ’na colina alessandrina in au-tuno, quando tuto paréa morto. El me pupà, bravo e passionà contadin, tuto preocupà par la cativa condission de l’imènso e pressioso vigneto e tuto cia-pà da l’inpegno che ghe voleva par ri-métare tuto in coltura de produssion, nol gavea tanto badà a sèrte piantine che jèra nele teste dei filari o vissìn ai serbatoi che servìa par fare el verde-rame, ma quando la primavera ga sco-missià a conparire e el vigneto dava segni de bona ripresa ale cure che par tuto l’inverno jèra sta fate, anca i pìcoli e trascurà albaréti se ga manifestà, proprio soto le feste de Pasqua, co fioriture de rosa che ne ga tuti incantà e mi me faséa pensare a on paradiso terestre. Col tenpo ghemo capìo chi che ghéa semenà tute chele piante. El Conte, proprietario dela colina, gavéa concesso a ’na veceta, la Rosina, amiga dela so faméja, on tocheto de tèra parché la se coltivasse on orto, qualche filaro de vigna, on poca de erba pa i conìci, on poco de formenton par le so galine… e la nona Rosina (cossì la ciamàvino) la gavéa piantà anca qualche frutaro e fra quisti dei persegari: uno bonorivo, uno a pasta bianca, uno a pasta zala, uno tardivo, stacaosso o no… Quando ste piante ga scomissià a dare fruti a ela i ghe xe tanto piasùi che la ga pensà de moltiplicarli sensa savére el scherséto de l’ibridassion e che proprio el persegaro che nasse dala so samensa dà on fruto tuto diverso dala pianta mare. Cussì, la colina xe sta infestà da ste joiose piante che le se cargava de on sfrasèlo de pèrseghi dai primi de giugno ai primi de novenbre, e la nona Rosina ga catà el pì grando cónplice in me pupà che le curava. Naturalmente i jèra pèrseghi selvàdeghi de forme, coluri e gusti tuti difarenti fra lori e speciali, ma proprio par questo i jèra bramài par fare marmelate o anca solo par magnarli.


Èco, mi vorìa donare a tuti ‘na rameta de persegaro, augurando ogni ben e tanta pase nel core.

Luciana Ecchiotti

 


Designed by Enrico Dalbosco (2011) - Powered by Joomla!