"Albari, veri amissi cari"

pubblicato sul mensile QuatroCiàcoe nel febbraio 2005

Me piasaria, in ‘sto spassieto che me xe stà donà, contarve quanto beo che xe vìvare in canpagna, in meso ai àlbari e inparare a conossarli. El mondo dei albari xe on mondo de silensio o de musica lisiera co’ l’aria passa in meso ale foje, on mondo de vita lenta, de chiete, on mondo che pare senpre fermo. I albari xe creature vive! Tante volte vedo che serti i se desméntega che lori i xe vivi e i vive come noaltri: i bee, i magna, ghe passa in tute le so fibre la linfa dela vita quasi come a noaltri ne core el sangue ne le vene, i gà bisogno de luce, de sole e magari de aria bona da respirare.

Se se metimo a vardarli e a conossarli, capimo che i àlbari e anca tute le erbe, conprese le oltrighe, xe nostri cari amissi. Lori i pole senpre donarne colcossa: fiori!, fruti, legno… e co’ i xe là fermi, che i pare sensa fare gnente, pensierosi e silensiosi soto le canìcole d’istà, a lori de sicuro ghe piase sentire la nostra conpagnia e ‘lora i ne dà ‘na fresca onbrìa che ne riposa. Bisognarìa che se abituassimo a avere tanto riguardo e rispeto par ‘ste “creature”, parché poarete, no le ga gnanca quela pìcola possibiltà de ciamare aiuto o proare a scanpare che ga tuti i animai quando che i xe in pericolo; lori no i pole proprio fare gnente par difendarse e bisogna che i se ciapa tuti i “maltratamenti” che i omeni ghe fa.



A parte ‘sti discorsi seri e inportanti che faremo oncora on poco ala volta, vorìa scumissiare a parlare de on àlbaro belissimo che go visto insieme ala me amica Enricheta in s’on giardìn antico. La Enricheta me xe tanto cara parché anca ela la ga tante passion: la voe vedare tuto, studiare tuto, scoltare tuto… e co’ la vien in giro co mi la xe proprio interessà e la crede a tuto quelo che ghe conto dei àlbari anca se no la ga mai vossuo proare a semenare gnanca on sucatéo o ‘na margherita in vaso.

Rivà in ‘sto giardin: “Oh che beo!, che grando!, co tanti àlbari…” ma anca tanto spassio libero che par mi fa parere oncora pì bei i albari. E se portemo su on posto che paréa on boscheto on poco selvadego: scomissiemo a vardare da tute le erbe mate che ghe xe e se catemo davanti on tronco enorme, ala nostra altessa de oci tuto beo rugoso e rotondo e nea base se vedeva dele grosse raise che se sprofondava ben in tera co tanto vigore e forsa. Pianeto pianeto lo vardemo tuto, alsando i oci e piegando anca la testa quasi da ‘ndare indrioschina, restando incantà dala so grandessa, dala forsa e nel stesso tenpo “gentilessa” de ‘sta enorme pianta.

Incantà dala so belessa, nel silensio de tuto torno, la Enricheta me domanda: “Xeo questo on cedro del Libano?” “Sì”, ghe rispondo. Vedo che ghe slùsega i oceti e in ponta de piè la se porta rente a ‘sto tronco e la lo imbrassa come s’el fusse la persona pì cara del mondo. Che sena! La Enricheta cussì picenina… la parea on vermeto in confronto al tronco del cedro.



Bisogna savere che ‘sta sorte de pianta xe ‘na conìfera senpreverde e la xe nata le prime volte in Siria, ne la Catena de l’Atlante e ne l’isola de Cipro; ghe ne esiste quatro varietà: cedro del Libano, cedro Deoadara, cedro Atlantica e cedro Brevifoglia che par mi le xe una pì bela de l’altra. Le xe conossue da tanti e po tanti secoi i a l’inissio le jera sercà par doparare el legno de gran bona qualità par fare navi, travature, mobili, statue, pavimenti… Parfìn Salomone se faséa fare le struture del so palasso e del tenpio de Gerusaleme! (cussì ne conta Vitruvio e Teofrasto). Ma a un serto tenpo i òmeni se gà incorto anca quanto che le jera bele e alora verso el 1500 i gà pensà de metarle nei giardini par belessa e da alora, scopiassandose uno co l’altro, tuti i giardini inportanti de l’Europa i gà avuo dei cedri. El merito el xe tuto nela qualità de ‘sta pianta che la xe tanto bela quanto rùstega. La se incontenta de ogni tipo de tera, la se adata ale tenperature de tuti i nostri paesi e la vive cussì tanto che noaltri no ghemo gnanca idea. ‘Na racomandassion vujo fare. Se par caso ve vien in mente de piantarghene una nel vostro giardìn, vardè ben prima quanto spassio che gavì. Bisogna savere che ‘sta pianta pole cressare fin a 40 metri e qualche volta la riva a 60 metri de altessa! Imaginémose anca la larghessa…! Mi me intristisso tanto co’ vedo ‘sti giganti piantai in giardineti de qualche metro quadro, tuti sacagnai e bruscai tanto che no se capisse gnanca pì chi che i sia e i vive par miracolo proprio parché le xe tanto resistenti. Pitosto, metìmose dacordo, organisemo ‘na bea gita co “pranso al sacco”, tuti insieme in coriera, come quando che jerimo tosati dela scola, e ‘ndemo a vedare quei bei e cressui ben dei giardini antichi.

Luciana Ecchiotti