I nostri cari veci àlbari

pubblicato sul mensile QuatroCiàcoe nel luglio 2005

Col “Gruppo del Giardino Storico dell’Università di Padova” semo ‘ndà a visitare l’antico parco dela Villa Papafava dei Carraresi che xe a Frassanelle sui Colli Euganei, dovéino sentire e védare ‘na lession che ne spiegàa come se cura, co’ “tecniche moderne”, albari che xe riussìi a deentare secolari.

I do sperti Simone Petrin e Alberto Schiavon i ne gà istruìo, prima con dei “video”, su tute le sorte de malatìe dele piante e dopo i ne gà dà ‘na prova pratica su come, ben ligài e inbragài i se pole ranpegare sui albari par visitarli, curarli o titare via rame pericolanti sensa bisogno de scale.

Par vardare el laóro che sa fare ‘sti do tosi se ghemo portài tuti sóto ‘na gran quercia e, anca on poco preocupài disévino: “Se no se ronpe la corda perché la xe nova e moderna ma se ronpe la rama che la xe vecia e antica? E prima come gài fato? E dopo come farài? E vale la pena?” Lori con tuta tranquilità e ‘na vena de alegria par le nostre preocupassion i ne rispondea e… Insoma… mi no vedea l’ora che i vegnesse basso da chel’albaro e, par distrarme on poco, me vardàa intorno parché jera ‘na jornada de primavera proprio bea e tuto el sotobosco jera verde e fresco de erbe selvadeghe e fra tute tiràa l’ocio ‘na fioritura de “colonbina” (o ga’eti), ‘na bulbosa che fa on fioreto delicato bianco e rosa e la fiorisse cussì fissa che la pare on tapeo che fa pecà pestarlo.

Nel giro dela visita se portemo in vista de on albaro a dire poco gigantesco. Anca da distante vedemo che ala base del so gran tronco xe tacà tuto torno dei fili. A me amica Enricheta!… la me toca on brasso e tuta inpressionà, soto vose, a me domanda: xei drio farghe “l’eletrocardiograma”? Sì, anca questo xe on modo moderno par conossare mejo el stato de salute e de stabilità de on albaro che gà tanti ani. El funsiona proprio come on ‘letrocardiagrama: dele picole ponte che xe tacàe a on filo vien messe nel tronco, oservando da dove che parte le fasse dele raise pi grosse e le trasmete a ‘na machina che registra anca la pì picola vibrassion dele fibre de l’albaro; dopo, tuti i segni vien lèti dal “computer” e, “interpretài” dai tenici che i capisse el grado de stabilità dela pianta.

‘Sto albaro el xe on esenplare ultracentenario de leccio. A vedarlo cossì grando, co ‘ste rame verte quasi a inbrassare e invitare soto la so ombrìa no se pole pensare che qualcuno gà sercà de brusarlo. ‘Sta bruta storia la gà contà el Conte Papafava che ne faséa da guida. Proprio cossì, xe stà inpissà fogo soto l’albaro e par fortuna l’è stà subito stuà ma el dì dopo i ghe gà riprovà fasendo pensare proprio ala volontà de distrùjare ‘sto monumento dela natura. Anca el secondo tentativo de incendio, par fortuna, xe sta fermà in tenpo, l’albaro ghe n’à risentìo on poco nele rame pi basse: i tenici xe subito rivài par le prime cure e adesso i lo tegnarà de ocio par vedare come che’l reagisse co’ la primavera. A ‘sto fato tuti semo restài par qualche minuto interditi, muti e tristi e se capìa che ognuno de noaltri pensàa a cossa farghe a ‘sti vandali par castigarli.

Intanto jera ‘ndà via el sole, e se ghea levà on vento fredo da tenporale, anca el tenpo dela nostra visita jera quasi finìo e pian pian se ghemo incaminà par tornare; mi me sentivo triste e preocupà, me vardàa intorno e vedéa ‘sto gran anbiente naturale cossì in pericolo par no poerlo téndare tuto e in ogni ora. No sté pensare che sia ‘na sustósa, no me stufarò mai de predicare che bisogna volerghe ben ai nostri albari, che bisogna difendarli, curarli, fermarse a amirarli, incantarse davanti a queli che xe sta bóni de deventare secolari e insegnarghelo anca ai nostri putei.

Luciana Ecchiotti