Home .Ricordi d'altri tempi C01 (Ricordi) Nonocanpanaro

"Nonocanpanaro"

pubblicato sul mensile QuatroCiàcoe nel maggio 2005

 

Par mi e tuti i so nevodi el jera el Nonocanpanaro; par la zente del paese el jera el Canpanaro e me nona la Canpanara; i so fioi jera i fioidelcanpanaro; le amiche e conpaesane de me mama e la ciama oncora Ceciliacanpanara; mi so la fiola dela Canpanara. No go mai sentìo me nona ciamarlo par nome ma la ghe ‘ndasea vissìn, quasi co’ riguardo e reverensa e la ghe disea: “… ciò …” e quando che la volea comandare co’ forsa e autorità ai fioi la lo ciamava “… vostro pare …”.

El so nome vero, come tuta la so persona, nol jera da poco, el se ciamava AUGUSTO.

Tuta la so vita e quela dela so fameja xe sta regolà dai orari del sóno dele canpane e dala cura par la césa: nei dì dea settimana, ne le doméneghe e ne le “feste grande” dela liturgia, dei matrimoni, batesi, créseme (co tanto de visita del Vescovo), prime comunion e funerài; e da on gran senso del dovere assistare e curare co la so presensa e afeto el pàroco.

La so giornata scomissiava ale 5 e mèza parché ale 6 el ghea da dare el primo “segno”. In pressa el se alsava da leto e co’ me nona l’inpissava el fogo, el se pareciava qualcossa de caldo da béare, de inverno el se infagotava nel so tabaro nero, el se fracava in testa el capéo de feltro nero, la pipa in boca par la prima pipadina che ghe scaldava on poco l’inissio dela jornàta, ai piè sòcoli e calsetoni grossi de lana filà a man e fati da me nona e col stesso passo calmo e misurà el partiva verso a so césa. Nel picolo tòco de strada che el ghea da fare (sinque o sie-cento metri) l’incontrava, senpre, el so caro amico feroviere; i do primi svéji del paese, el primo scanbio de saludi e l’amico ghe dava l’orario preciso par regolare el relòjo del canpanile.

Dopo aver regolà el relòjo e dà el segno de l’Ave Maria el pareciava tuto par la messa che ogni matina el paroco “diseva”. Anca de inverno, co’ el fredo e bruto tenpo, tute le matine ghe jera chi che ‘ndava a messa fasendo tanta strada a pié, catando na picola césa freda e giassà ma on altare senpre in ordine, luminoso e vibrante dela fede de on omo canpanaro che se trasformava in zagheto e de on prete sicuro de no éssare mai solo. La matina bonora la finiva cussì e subito dopo messa el tornava casa pién de fredo e oncora col corbàtolo indosso el se pareciava na marendina fata da do fete de poenta brustolà so ‘na teceta dove che prima el ghea messo do fetine de lardo a frìzare, el tuto bagnà da ‘na onbreta (ma picola) de vin che, lu el disea: “me va tuto in sangue”.

La matina, spetando che rivasse mezodì pa’ ‘ndare a sonare l’Angelus, la passava secondo le stajón e cussì anca el dopo mezodì fin a l’ora de segnare l’ultima Ave Maria dela sera.

El Nonocanpanaro savea fare ben el falegname. E alora, de inverno, a so cusina, che jera abastansa granda e l’unico anbiente on poco caldo, la se trasformava in falegnameria e là, serte tole che el se ghea parecià par tenpo parché le se stajonasse lu le trasformava in cardense, tole da cusina, careghe, o casse par métare a farina, o moscarole, o pìcoi atressi che servìa in cusina come i guciari de legno, méscoe par fare la polenta, talieri senpre par la polenta o par bàtare e pestare carne e verdure; el laorava in silensio e lento e preciso, ala fine el so laóro parlava par lu. Tuto jera fato ben, tuto parea morbido, ben levigà, beo da védare. Qualche volta, coi ultimi ritàji e tochiti vansài el meteva insieme dei zugàtoi: caretini, cariolete, masteliti e tolete da lavare e tuto questo dimostrava la so gioiosità e l’atension e l’afeto che el ghea pa’ i putéi.

Apena se verzéa la stajón, ‘naltro intaresse lo ‘tirava forte: la cura pa’ on tocheto de tera che lu ciamava “la strica”. Me mama la se ricorda oncora che sta stricheta de tera la se trasformava in on pìcolo paradiso terestre par tute le piante da fruto che se poea catare, nessuno in paese ghea ‘na passion cussì granda pa’ i frutari. Ne la bea stagion l’orto, tuto ben ordinà co le so gonbine in squara perfeta jera on spetacolo da védare e anca mi me ricordo ‘na gonbina che me interessava pì de tute: a jera a pì granda, verde, fresca e profumà de fragolete de bosco che la nona me faséa catare za pronte col sùcaro e on giosseto de vin.

Tuto sto laóro però el jera solo on modo par ciapare qualche schèo, par passare ben el tenpo, par dimostrare amore ala so faméja, insegnare e stare coi so fioi, jutare on poco la so fémena. El so pensiero, el so core, el so laóro vero jera canpanaro.

Qualche volta, sta pace, bisognava interonparla, e la jera senpre ‘na ocasion trista: jera quando che el dovea dare el segno dei morti. Alora a notissia se spandéa par tuto el paese in so on minuto e bastava contare par savere chi… tre segni pa’ on omo – dó par ‘na dona. Qualcuno passava dala casa del canpanaro o in césa, el domandava notissie, in poco tenpo tuti se radunava ‘torno a la fameja in luto.

El Nonocanpanaro no’l jera istruìo, el ghea fato a tersa elementare che par chei ani jera tanto, ma scoltando senpre le leture sacre e parlando coi preti el se ghea fato dele idee ben precise che col tenpo, la fortissima fede ne la so relijon, el continuo “meditare”, ghea messo raìse fonde e sicure e jera fàssile catarlo a discùtare forte col so pàroco o portare a esenpio “brani” dele Scriture quando i amissi ghe domandava consìlii.

Ma el canpanaro dovea pure vìvare e mantegnere a fameja e chi lo pagava? La casa e la strica de tera jera dela Curia, e tuto el resto?

Ghe jera la sérca! Par questa el se ghea ‘llevà ‘na musseta e fato on caretìn e el passava casa par casa: in primavera e sóto Pasqua i óvi – in istà el formento – in autuno el formentón e la uva. La zente lo acolieva co’ sinpatia, amicissia e alegria e, come che se usava, ghe ofriva anca ‘na onbréta… Me nòna! Quando la lo vedea tornare… alegro, ciacolón, come che nol jera mai… nol ghe piaséa, e la se rabiava tanto! Anca quando che el giro de sérca jera col paroco sucedeva cussì, ma alora tra lori le Sacre Scriture jera el gropo da svissarare da veri esperti.

Mi da putela jero senpre atenta ai segni dele canpane: me jera sta’ insegnà cossa che i volesse dire e me piaséa tanto quei dele feste grande e dela ultima messa dela doménega; i jera segni festosi, pieni de musica, bisognava doparare e canpane come on strumento da concerto e el Nonocanpanaro el dovea farse jutare da qualcuno pa’ e canpane da tegnere “in ferma”. De solito lo jutava la nona e quando che i fioi xe stà  granditi i ga scomissià a jutarlo lori, in spècie uno che da grando xe deventà - Canpanaro - fazendo passare de grado el nono che xe deventà el -Veciocanpanaro - .

‘Naltro segno che me piazeva tanto, ma tanto!, jera quelo pa’ i sposi. El jera on segno de ‘na festosità oltre misura e mi me ricordo che me sentivo el core quasi s-ciopare, me fermavo a scoltarlo e me imajinavo quando el nono lo gavarìa sonà par mi. Pecà che non xe sucesso; quando mi me so sposà el nono no ghe jera pì e queo che xe triste anca el so mestiéro non esisteva pì. Al so posto xe sta messo motori eletrici programài coi sóni tuti conpagni tanto che no se distingue pì la gioia dal dolore, la festa o la mestissia. I putèi oncó i sà tante bee robe, anca inportanti, ma no i conosse el vero sóno dele canpane.

Luciana Ecchiotti    

 


Designed by Enrico Dalbosco (2011) - Powered by Joomla!