"Acquaforte, acquatinta..."

pubblicato sul mensile QuatroCiàcoe nel dicembre 2005

Acquaforte, acquatinta, punta seca, maniera nera, bulino: cossa vorrà dire tute ’ste parole… epure el risultato che vedo xe: belessa! Sì, carte bianche o on poco inzalìe dal tenpo, disegni a inchiostri scuri co parte piene de onbra o lanpi de luce che descrive paesaji o figure umane o fiori e fruti, e nela base del disegno, scrito a matita, on nùmaro e la firma de l’autore. Da senpre me incanta ’sta forma de arte che se ciama “incisione” e par tanto tenpo me xe restà indrento a curiosità de conossare el vero significato dele parole che la conpagna.

Xilografia, calcografia, litografia: xe modi de fare incision secondo che se dopara tòle de legno, lastre de rame o zinco, lastre de pièra. Acquaforte, acquatinta, punta seca, maniera nera, bulino: xe teniche par incìdare su lastre de zinco o de rame on disegno, che deventerà ’na matrice par stanpare tante copie, senpre originai. Acido nitrico, percloruro de fèro, vernise par incision, colofonia, petrolio, nitro, cera mola, bianco de spagna, goma arabica, cera vergine, bitume giudaico, acqua ragia… e altri materiali che desso non me vien in mente xe quei che serve non solo a dare on odore che par mi xe profumo tuto speciale, al laboratorio dove se crea l’incision, ma i xe indispensabili par poderla fare. In particolare, l’acido nitrico xe el prodoto pì pericoloso parché “fortemente” corosivo; epure, doparà coi guanti e in minima parte smissià co l’acqua eco che el dà vita a l’incision che se dise a l’acquaforte.

Dala metà del ’400 inissia l’arte de l’intajo su legno (xilografia) usà dai ilustratori de libri; in seguito Mantegna e i so scolari xe artisti de primo ordine che presenta teniche de incision anca su rame ciamàe a bulino (che la xe ’na particolare ponta de aciaio). Nel Veneto e pì de tuto a Venezia fiorisse maestri e boteghe de incision inportantissimi co disegnatori lustrissimi: Tiziano in prima fila, e po’ Carpaccio, Cima, Campagnola… e in Germania Dürer, grandissimo e straordinario incisore sia su legno sia su rame. Le so incision no xe mai finio de vardarle e mi ringrassio el caso che, par on fatarelo che qua no posso contare parché no ghe xe spassio, go dovùo sercare e conossare le so opare, e stupirme, incantarme e entusiasmarme senpre de pì osservando i so disegni. Nel ’600 e specie nel ’700 la pratica dell’acquaforte ciapa forma de arte in sè e xe Rembrant e Canaletto co i so paesagi, olandesi quei del primo e venessiani quei del secondo, a stupire e maravejare co l’arte de l’incision.

Tanti xe i artisti, specialmente pitori, che ga sercà de esprimarse co l’arte incisoria, fin a rivare ai nostri tenpi dove la fassilità de trovare i materiali, i strumenti tenicamente pì moderni e comodi da usare, la gran varietà de inchiostri e carte da stanpa, ga invojà a proare continuamente nóve maniere par ’vere risultati senpre pì carichi de espression anca se in aparensa tanto diversi da quei dei primi maestri.

E tante xe le mostre che presenta opare de incision dale pì straordinarie ale pì senplici, ma senpre, secondo mi, cariche de “fascino”. Merita ‘na bela visita la mostra che xe sta inaugurà el 26 de novenbre e che restarà verta al publico fin al 31 dicenbre 2005: a xe ‘na mostra coletiva dei “Incisori Italiani Contemporanei” (sito web www. incisoriitaliani. it) nel Castello dei Da Peraga, via Arrigoni, Vigonza (PD), apertura sabato e domenica ore 16.00-20.00.

Luciana Ecchiotti