"Arte Sella"

pubblicato sul mensile QuatroCiàcoe nel luglio 2006

Arte Sella è una biennale di arte con-temporanea. Da ‘na idea nata nel 1986 e portà ‘vanti on pochi de ani co timi-dessa, nel 1996 ga ciapà forsa on bel projeto, ben organisà e regolà e che ga dà vita a on percorso ciamà ARTENA-TURA. Chi vole védare le opare se in-camina so on sentiero de montagna e pian pian l’incontra ‘ste sculture fate da 39 artisti italiani e stranièri.

clicca qui per vederealtre fotografie di Arte Sella!

L’anbiente xe uno dei capolavori dela natura! Tuto on bosco fresco e onbroso de abeti rossi e faji. Inpossibile descri-vare a parole l’efèto che se forma co ‘sti do tipi de albari messi insieme e el so-tobosco che se crea xe delicato (anca parché penetrà da poca luce) e forte par la presensa de sassi o roce che spunta dal verde. Eco, in serte picole radure, dove ghe xe ‘na sensazion car-ga de imajinassion se pole védare o in-travédare ‘na òpara umana che serca de maraejare chi che passa, fasendo a gara con la straordinaria òpara dela natura e in tute do le te ferma, le te sforsa de vardare, considerare, fanta-sticare e “criticare”. Tute le opare umane xe costruìe col materiale che ofre l’anbiente, nessun albaro vien sacrificà: rami sechi, tronchi rabaltài, fòje, sassi, raramente xe usà altri meteriai o colori artificiài e casomai questi vien inserìi al minimo e mai messi tanto in vista. Qualche òpara nel tenpo se consuma, la torna a èssare parte de l’anbiente e anca par questo le xe costruìe col materiale che ofre el bosco.

Le forme xe quele che sujerisce la na-tura ma ingigantìe e trasformàe da l’estro dela fantasia de l’artista. Ogni òpara ga on titolo: eco parché quando la se incontra, caminando come so ‘na bea e calma passejata in montagna, pian pian la se varda tuta, se lese el ti-tolo che ga dà l’autore e subito se xe portài a vardarla mejo, a sercare de ca-pirla, de osservare come e co cossa la xe sta fata, se la risponde al titolo che l’autore ghe ga dà: insoma se deventa quasi dei “critici d’arte” ma anca dei autori.
Se camina so 3 chilometri de strada fo-restale squasi senpre… comoda e on-brosa, basta scarpe che sostegna ben i pié e on abiliamento da montagna se-condo la stajon, magari in spala on bel saco co’ qualche bibita e calcossa da métare soto i dinti. Mi go visità ‘sto pa-radiso terestre l’ultima setimana de a-gosto, indovinando on tenpo belissimo e tuto me xe parso sereno e pien de armonia: i colori e la luce, i rumori, el canto dei osèi, el lisiéro sfregolare dele fòje…(i visitatori, conpresi i putèi, dava segno de sorpresa e incantamento, se conportava come se i fusse so on posto Sacro e tuti se parlava quasi sotovóse), i profumi de résina, mus-cio, fòje seche e ciclamini. Tuto el percorso jera fiorìo de ciclamini profumatissimi e cossì tanti che i paréa semenà. Chissà quanti spe-tàcoli, senpre difarenti mostra ‘sto an-biente secondo e diverse stajon!

‘Sto ano Arte Sella conpisse 20 ani. Par festejare xe previste tante manifestas-sion artistiche e ‘na mostra che fa co-nossare tuto el laoro fin da quando el xe sta scomissià: opare d’arte, fotogra-fie, disegni… e tuto par capire come xe nata l’idea e fare védare l’anbiente e el rispeto che merita la vera grandissima opera d’arte dela natura.

Chi volesse passare ’na giornata stra-ordinaria pole informarse: Arte Sella, Piazzetta Ceschi, 1/A - 38051 Borgo Valsugna (TN); Centro Espositivo Arte Sella c/o Malga Costa, Val di Sella – Borgo Valsugana (TN) - Informazioni: 339/2099226; sito web: www.artesella.it, email: Questo indirizzo e-mail è protetto dallo spam bot. Abilita Javascript per vederlo.

Luciana Ecchiotti