"Vigne, vin e laoro"

pubblicato sul mensile QuatroCiàcoe nell'ottobre 2006

… … …
Tua carne è il pane. – Ma tuo sangue, il vino. – 
Che odore sa l’odore di pan fresco! – 
E che cantare fa cantar di tino! – 
… … …
Io la madia e la botte amo; e il loquace 
tino ben canta, e bene odora il forno: 
io ridirvi non so quanto mi piace 
il vin d’un anno con il pan d’un giorno!”

G. Pascoli: Grano e Vino da Primi Poemetti – L’Accestire

Da mile e mile ani prima de Cristo xe conossùa la vigna pal so fruto e par la possibilità de trasformarlo in vin. La xe manco inportante par la vita umana del formento, formentón o riso però superiore a ‘ste specie par come la se intrecia nela storia dele civiltà.

Basta pensare che par ogni picolo o grando fato gioioso, par ogni incontro festoso o par gòdare qualche ora insieme a amissi, parenti, conossenti, conpagni de laóro… xe spontaneo stapare ‘na bona botilia de vin che el sia bianco o rosso spumante o no. El pi modesto pasto o il pi gran pranso xe conpagnà dal vin e nessuno pensa, gnanca par scherso, de farlo mancare. Lesendo anca in pressa ópare dei nostri pi grandi scritori o vardando piture e disegni vedemo come la Vigna e l’Uva sia stà inportante imàjine de ispirassion poetica o figurativa. Bisogna alora riconossare a ‘sta pianta ‘na posission de massima presensa nela fruticultura mondiale e, in particolare nela nostra penisola, la se deve considerare anca come ‘na conponente de la belessa paesajistica. Co l’espandarse de l’Inpero Romano anca la coltivassion dela vigna se spande ma la perde de popolarità co la decadensa romana in tuto el tenpo barbarico e del basso Medio Evo. Par fortuna in ‘sto longo periodo l’arte de fare el vin e soratuto la conosensa botanica dela coltivassion dele vigne xe mantegnùa e senpre pi perfessionà dal laóro sapiente dei ordini religiosi: el vin nel sinbolismo catolico el rapresenta el sangue de Cristo e subito capimo come nei monasteri, confraternite, conventi e abassìe ghe fusse gran intaresse e passion par studiare senpre nove tèniche che pian pian vegnéa messe in pratica da tuti.

Anca i mercanti e i navigatori ga on gran merito nela conosensa de piante de vigne e vini diversi e de gran qualità riportài dai viàji. Do grande scoperte, quela de l’America e dela stanpa, aumenta l’intaresse ‘torno ala coltura dela vigna. Da l’America riva in Europa tante specie selvàdeghe che servirà, co l’ibridassion, a rinforsare e miliorare la qualità dele nostre, e co la stanpa i studiosi e botànici pole far conóssare mejo tuti i studi e le novità de sta coltura che deventa senpre pi difissile data l’abondansa, varietà e qualità de fruti, bianchi o rossi, da magnare diretamente o da vinificare, ma che se scontra co i anbienti diversi da dove che le nasse a dove le vien coltivàe.

Insoma no tute le qualità de vigna se pole coltivare in qualsiasi tipo de tera o de clima e questo bisogna asolutamente saverlo e dal ‘600 all’800 xe tuto on spandarse de conosense e scriti par informare i coltivatori el pi possibile finché se riva al fato novo, pi inportante, da ‘na parte dramatico ma da ‘naltra el porta nove grande conosense. La difusion e la lota de tre gravi malatìe: l’Oidio, la Fillóssera e la Peronospora. Grandissimi sforsi, studi, tentativi par fare fronte a ‘sti tre parassiti che gà sterminà intieri vigneti xe sta sostegnùi da tuti i ómeni che gavea a córe la coltura de l’uva sia dal punto de vista produtivo-economico che sientifico-botanico. Adesso sarìa longo e diffisile contare quanti tentativi e osservassión sientifiche rigorose xe sta fate par conbatare la pi maligna, la Phyllossera Vastatrix che xe rivà in Francia da l’America e in pochi ani la se gà sparsa in tuta Europa, fatostà che co prodoti chimici (verderame, calsina, sólfaro), ibridassion dele piante, inesti, coltivando le piante nele tere e nei climi pi adati ale diverse specie semo rivai ai risultati che noaltri poémo vedare: granda varietà de uve da tola e da vin e straordinari vini che ogni rejón italiana pole ofrire a tuto el mondo.

Ma no posso no ricordare adesso de ‘vere passà i ani pi beli de la me infansia so ‘na caseta in sima a ‘na colina (brico) de Valenza Po (Al). La jera de proprietà del Conte A. Annibaldi Biscossa e tuta coltivà a vigneto: barbera, grignolino, moscato bianco. Me pupà el jera el pi bravo, belo e apassionà coltivatore de ‘sto imenso “jardin de vigne”. Sì el parea on jardin, come dal resto, tuti i vigneti coltivài ben. Ogni dì de l’ano jera inpegnà nela cura del vigneto conpresa la doménega dopo mezodì parché la matina, dopo messa, ghe piaseva stare on poco in piassa par sentire le ultime novità dai altri contadini. L’inverno jera tuto par bruscare, concimare, rinovare i paleti de sostegno e i fili. (Ogni vigneto, de colina o pianura secondo la qualità dela tera e secondo el clima ga bisogno de essare “tirà” in modo diverso par favorire la cresita dele piantarele e a frutificassion e serti modi de inpalcare le vigne i xe veramente spetacolari). La primavera e l’istà el gran laóro lo dava el diserbo, tuto fato a man, e i tratamenti antiparassitari che dovéa èssare senpre puntualissimi. L’istà jera anca on periodo de ansia e paura apena se sentiva in lontanansa on brontolare de tenporale che poéva portare sì aqua benedeta ma anca tanta tenpesta da distrùjare tuto… Ma quando rivava ottobre! La vendema jera on gran laóro ma anca ‘na gran festa par tuti! El Conte, tuta la so fameja e on grupeto de altre persone vegneva a vendemare e me pupà deventava el capo de tuti. Mi lo vedevo come on Dio. Tuti, anca el Conte se meteva soto i so ordini: precisi, serii, conpetenti ma dài co alegria, spirito, galanteria e on soriso che no scondeva ‘na pontina de orgolio e la sicuressa de ofrirghe al so paron i fruti de on laóro fato proprio ben. Tuta l’uva vegneva portà e laorà nela cantina de proprietà del Conte e là el pupà se inpegnava, co risultati straordinari, ala cura del vin. El ciclo del gran laóro intorno ale vigne prima e al mosto dopo jera senpre, dopo el primo travaso, coronà da ‘na séna che me ricordo col core pien de afeto. Me pupà e el Conte nela porta dela cantina che i spiéra in controluce la trasparensa e el colore de on goto de vin, dopo i lo nasa e pian pian, a làvari streti i ghe ne asorbe on giosseto, i lo gusta, i ghe ne prova ‘naltro, i se varda… (anca mi i vardo par indovinare el giudissio). Parla, senpre par primo me pupà: “Sangue de Dio! Signor Conte, anca ‘sto ano savemo chi ringrassiare!” El Conte ride, contento, el ghe dise “bravo, Cesare”. Anca mi so contenta de védarli cossì, sodisfài e pieni de corajo par afrontare ‘naltro ano de duro laóro.

Luciana Ecchiotti