L'albaro da le sete virtù

pubblicato sul mensile QuatroCiàcoe nel dicembre 2006

Diospyros, o la pianta co’ “fruti” degni “del dio Jòve”, dela fameja dele Ebenacee, de alto intaresse par la produssion de fruti e de legni de gran qualità.
Quando l’autuno se porta verso l’inverno e la luce del sole deventa senpre pi palida ghe xe on albaro che a incontrarlo el ne incanta e sorprende mostrando on tesoro segreto. Se in primavera e istà lo vedevino come ‘na pianta verdissima che ne invitava a gódare la frescura dela so onbrìa, le prime bróseme de novenbre e ghe fa càdare de colpo tute le fòje mostrando i fruti picài ale rame come tanti pìcoli soli vegetali robài a l’istà.
A incontrarlo ‘sto colpo de luce me vien in mente la prima strofa de ‘na bèla poesia de Cardarelli: Sole d’autunno inatteso / Che splendi come un di là / Con tenera perdizione / E vagabonda felicità…

Ma da dove ‘rìvelo el Diospyros? Pare che el D. Lotus sia stà portà nel 1596 da l’Asia; che el D. Virginiana (pi salvadego e da legno pressioso) riva nel 1620 da l’America e el D. Kaki riva nel 1789 dala Cina e Giappone. Ma sercando sercando, lesendo de qua e de là, vardando e osservando me vien da concludare che el D. Virginiana e elD. Lotus i sia boni portainesto par le pi gustose qualità del D. Kaki giaponese. In Giappone el caco ga el valore de “frutto nazionale” come par i fiori el crisantemo e i giaponesi i ghe vanta sete virtù: longa vita (i pol vivare anca 500 ani); grande onbra; mancansa de gnari de osèi (questa no me pare ‘na virtù, ma me gòdo védare quanto che ghe piase magnare i cachi ai osèi!); mancansa de tarli nel legno; possibilità de zugare cole fòje indurìe dal giasso; bel fógo vivace e che ’l scalda; gran quantità de sostanse nutrienti par la tèra.

Riguardo la longa vita, se sà che dala tremenda distrussion dela bonba atomica nel 1945 a Nagasaki, xe sopravissua ‘na piantina de caco. Sinquanta ani dopo, el studioso giaponese Masayuki Ebinuma xe riussìo a far nassare, in seconda jenerassion, diverse piantine che el ga scomissià a distribuire ai putèli e insieme a l’artista Tatuo Miyajima el ga organisà el projeto “Rinascita del tempo”. El projeto xe sta presentà ala 48° bienale de Venezia co’ la speransa de mandare in tuto el mondo, soratuto tirando l’atension dei putèli, che xe pi sensibili e atenti, on grando e urgente riciamo de pace (se pole catare notissie in internet su www. crisyuri. it/ Villaverla_2005. htm)
No pole vivare in Europa i Diospyros da legno parché no i xe favorìi dal clima. El D. Ebanum cresse in India, Ceylon, Malesia, Indocina; el D. Ebenaster vive in Messico; el D. Melanoxylon nele Indie Orientali; el D. Mespiliformis in Africa. Tute ‘ste varietà de belissimi albari, che deventa tanto grandi e grandissimi i produse l’ebano, legno de altissima qualità e valore economico.

Par tanti ani el caco xe stà coltivà solo nei orti botanici e nei jardini come curiosità o da belessa e solo dopo el 1850, mejorando co’ inesti la qualità del fruto, el ga ciapà on posto inportante come albaro da fruto parché tanto gustoso e nutriente.
E no’l poeva mancare nela strichéta de tèra de’l me nono, el nono canpanaro, tanto passionà a coltivare frutari de tute le sorte. Me mama la me conta, ela jera putèla quando che xe sucesso, che on bel dì el nono xe tornà dal marcà co’ ‘na piantina che parea on steco ma che lu ga inpiantà con ‘na cura quasi esajerà, davanti ala casa a ‘na giusta distansa parché la poesse cressare ben. La nona la seguiva el laóro, e el nono ghe contava tute e qualità, la forma, la gran quantità de nutrimento de ‘sto fruto, la belessa… (tuto par sentùo dire, so la fiducia del venditore!); la nona scoltava e la menava a testa… Ma nei ani, quando la piantina se ga ben infrancà e la ga scumissià a dare fruti…! La jera deventà davero on tesoro de fameja. Cossì bela! Co’ fruti cossì fora stajon e tanto boni! El nono li vendemava co’ cura e dopo li spartiva co’ i òto fioli, a ogni fiolo el so numaro de cachi che i doveva tegnerse da conto, farli deventare fati par ben e magnarli a piassere. Me mama ‘a jera fra i primi a finire la so parte e alora ‘a deventava tanto jentile con on so fradelo che, “pi sparagnin” la diseva ela, el se li tegneva da conto. I deventava anca merce de scanbio: “Nina, me darìssito on colpeto ala piega dele braghe da festa?” “Mi sì, ma ti cossa me deto?” “On caco… du cachi.” (che pressi! altri tenpi).

Luciana Ecchiotti